В Национальном парке Пелистер обновляют инфраструктуру и обсуждают строительство канатной дороги

Од Битола до Пелистер има десетина километри. Доволни се неколку минути за градската врева да ја заменат моликовите шуми, свежиот планински воздух и природата што со децении го прави Пелистер едно од најпрепознатливите места во Македонија. Оддалеку изгледа мирен. Но, никогаш не е ист. Овде природата го диктира ритамот, а човекот е само нејзин гостин. Не случајно е прогласен  за првиот национален парк во Македонија. Речиси осум децении подоцна, Пелистер останува едно од најзначајните природни богатства во државата, предмет  на бројни научни истражувања, но и причина поради која илјадници луѓе секоја година повторно се враќаат. За посетителите полесно и побезбедно да ја доживеат планината, Националниот парк во изминатиот период работеше на обновување на туристичката инфраструктура – патеки, информативни табли и уредување на најпосетените локалитети. Пелистер сè повеќе привлекува љубители на активниот туризам. Во срцето на Националниот парк се наоѓа хотелот „Молика“, најголемиот сместувачки капацитет на планината, кој очекува повеќе домашни и странски гости. Но, вистинската приказна за Пелистер не ја раскажуваат ниту бројките, ниту проектите. Најдобро ја знаат луѓето што со децении ги минуваат неговите патеки. Еден од нив е Петар Ставрев – планинар и новинар, кој повеќе од шест децении речиси секоја недела се искачува на Пелистер. И на свои 85 години, традицијата не ја прекинува. Во сите сезони Пелистер привлекува планинари, велосипедисти и љубители на природата. Годишно Националниот парк го посетуваат околу 50 илјади посетители. Една од најчестите забелешки на посетителите останува патот до Националниот парк. Подобрата инфраструктура би значела полесен пристап и повеќе посетители. Во план е и изградба на гондола од Цапари до Антена, инвестиција проценета на над 58 милиони евра. Експертите велат дека развојот мора да оди паралелно со заштитата на природата. -Нашиот предлог е гондолата да започнува од подрачјето на Цапари, од локација што дополнително ќе се утврди. Првата делница би била со гондола за 10 лица до Ловечкиот дом, а оттаму со поголема гондола, со капацитет од 80 лица, до врвот Пелистер. На меѓустаницата е предвиден помал бар или ресторан, додека кај објектот на Македонската радио-телевизија на врвот би се изградил поголем ресторан. Таа инфраструктура би се користела во текот на целата година. За посетителите е предвидена и ротирачка платформа за разгледување, која ќе овозможува панорамски поглед од 360 степени, вели Франц Фурлан, експерт за жичници од Словенија, изјава 5 Но развојот носи и поголема одговорност. Подеднакво важно е да се зачува она поради што Пелистер е препознатлив. Минатогодишното силно невреме остави сериозни последици врз дел од старите моликови шуми. Голем број стебла беа оштетени, а денес приоритет е воспоставувањето шумски ред, расчистувањето на оштетените површини и природното обновување на шумата. Одговорноста за зачувување на природата не завршува со институциите. Таа започнува со секој посетител. На тоа потсети и шведскиот амбасадор во Македонија, Ола Солстром, при посетата на Националниот парк Пелистер. „На индивидуално ниво, можеби Швеѓаните можат да ги научат Македонците да не фрлаат ѓубре – во шумите. Во Македонија можеби има подобро овошје и зеленчук отколку во Шведска, но ние сме подобри затоа што не фрламе ѓубре во природата. Тоа е лекцијата што може да се научи од шведскиот народ- рече Ола Солстром, амбасадор на Шведска во Македонија  Пораката е едноставна Токму таквата свест е предуслов Пелистер да остане зачуван и за генерациите што доаѓаат. Пелистер е многу повеќе од национален парк. Тој е дом на ретки видови и едно од највредните природни богатства во Македонија. Предизвиците се големи, но целта останува иста – да се развива, без да го изгуби она што го прави единствен. Новинар Емилија Мисирлиевски Снимател Златко Јосифовски © 2020 Телевизија Телма. Сите права се задржани. Овој текст не смее да се печати или емитува, во целина или во делови, без договор со Телевизија Телма.