В Норвегии не обнаружено превышения норм ЕС по лекарствам и токсинам в выращиваемой рыбе

Forskarane fann ingen overskridingar av EUs grenseverdiar for legemiddel og miljøgifter i norsk oppdrettsfisk i fjor. Ingenting tyda heller på bruk av ulovlege stoff. Det er Havforskingsinstituttet som omtaler dei ferske resultata frå det nasjonale overvakingsprogrammet for oppdrettsfisk for 2025. På oppdrag frå Mattilsynet har dei analysert nesten 2000 filetprøver av oppdrettsfisk, samla inn gjennom året frå heile produksjonskjeda. – Mesteparten av filetprøvene var frå oppdrettslaks, men vi sjekka også regnbogeaure, aure, kveite og torsk, seier Annette Bernhard, prosjektleiar ved HI, til HI sin nettstad. Låge verdiar Prøver som blei testa for godkjende veterinærlegemiddel og miljøgifter, blei samla inn på slakteri og er representative for norsk oppdrettsfisk som er klar for marknaden. Restar av avlusingsmidla cypermetrin og deltametrin blei påviste i enkelte prøver, men alle nivåa var under fastsette maksimumsgrenseverdiar (MRL). – Cypermetrin er framleis godkjent som lusemiddel i EU, men det er ikkje lov å selje middelet i Noreg. Dette tyder på at dei påviste restane av cypermetrin sannsynlegvis stammar frå fôret, og ikkje frå legemiddelbruk i oppdrett, seier Bernhard til nettstaden. Deltametrin er framleis i bruk som legemiddel mot lus, men i svært avgrensa omfang. For deltametrin kan både legemiddelbruk og restar av plantevernmiddel i fôr vere moglege kjelder til nivåa som blir påviste. Konsentrasjonen av miljøgifter som PFAS (per- og polyfluorerte stoff – såkalla evigkjemikaliar), dioksin, dioksinliknande PCB, kvikksølv, bly, kadmium og uorganisk arsen låg i alle prøver under EUs maksimumsgrenser (ML) der slike er fastsette for fisk. Prøvene blei også analyserte for ulovlege og uautoriserte stoff. Resultata gav ingen indikasjonar på ulovleg bruk i oppdrett. (©NPK) Tema i artikkelen Følg det du er interessert i, og finn artiklane på For deg