В Похаре пройдет благотворительная пешеходная экспедиция «Суммер Хайкинг»

पोखरा । सहारा क्लब पोखराको आयोजनामा स्वास्थ्य, पर्यटन र सामाजिक सेवाको सन्देशसहित ‘समर हाइकिङ फर च्यारिटी-२०८३’ आयोजना हुने भएको छ । सहारा फुटबल एकेडेमीको सहयोगार्थ आगामी शनिबार हाइकिङ आयोजना गर्न लागिएको हो । क्लबका अध्यक्ष केशवबहादुर थापाका अनुसार पोखरा-९ स्थित फल्चाबाट बिहान ७ बजे हाइकिङ सुरु हुनेछ । सहभागीहरू पर्यटकीय क्षेत्र काहुँडाँडासम्म पुग्नेछन् । प्रकृतिसँग रमाउँदै शारीरिक व्यायाम गर्ने अवसर प्रदान गर्नुका साथै सामाजिक सेवामा सहभागी गराउने उद्देश्यले कार्यक्रम आयोजना गर्न लागिएको अध्यक्ष थापाले बताउनुभयो । उहाँका अनुसार हाइकिङमा सहभागी हुन प्रतिव्यक्ति एक हजार ५०० रुपैयाँ दर्ता शुल्क तोकिएको छ । शुल्कमा सहभागीलाई टि-सर्ट, खाजा र खाना उपलब्ध गराइनेछ । आयोजकका अनुसार करिब ३०० जनालाई सहभागी गराउने लक्ष्य राखिएको छ । हाइकिङबाट संकलित रकम सूर्यबहादुर केसी स्मृति सहारा फुटबल एकेडेमीको सहयोगमा प्रयोग गरिने क्लबले जनाएको छ । पोखरा-१७ दोबिल्लास्थित सहारा एकेडेमीमा हाल विभिन्न १६ जिल्लाका ३० जना बालक आबद्ध भई फुटबल प्रशिक्षण लिइरहेका छन् । कार्यक्रमलाई पोखरा महानगरपालिका-९, तमुधीं युके, सहारा युके, अखिल नेपाल फुटबल संघ (एन्फा) कास्कीलगायत विभिन्न संघसंस्था तथा व्यक्तिले सहयोग गरेका छन् । क्लबका पूर्वअध्यक्ष विक्रम थकालीले सामाजिक सेवाको अभियानमा विभिन्न क्षेत्रबाट सहयोग प्राप्त भइरहेको जानकारी दिनुभयो । सहारा क्लब पोखराले लामो समयदेखि सामाजिक सेवासँगै ‘आहा! रारा गोल्डकप’ फुटबल प्रतियोगिता आयोजना गर्दै आएको छ । हाइकिङलाई पनि क्लबले सामाजिक उत्तरदायित्वसँग जोडिएको अभियानका रूपमा अघि बढाएको जनाएको छ । यो खबर पढेर तपाईलाई कस्तो महसुस भयो? 0 Like 0 Love 0 Happy 0 Surprised 0 Sad 0 Excited 0 Angry